Spitali Amerikan, Author at American Hospital

Osteoporoza

Është sëmundje metabolike kockore, e cila çon në ulje të densitetit të kockave duke i bërë ato më të brishta e më të prirura për fraktura. Është më e shpeshtë te gratë pas menopauzës dhe kjo lidhet me rënien e sasisë së estrogjenit në gjak. Në përgjithësi nuk ka shenja klinike deri në momentin që ndodh një frakturë.

Frakturat vertebrale (të shtyllës kurrizore) paraqiten si:

Dhembje e fortë, e menjëhershme pas një rrëzimi ose traume minimale
Dhembje e cila është e lokalizuar në një nivel specifik të shtyllës kurrizore (përgjithësisht në vertebrat torakale dhe lumbare)
Dhembja është e mprehtë, e thellë, përkeqësohet nga lëvizjet dhe në disa raste përhapet në pjesën e përparme të barkut.
Pacientët qëndrojnë shtrirë në krevat për të lehtësuar dhembjen, e cila mund të zgjasë deri në 4-6 javë.

Osteoporoza çon dhe në fraktura të legenit të cilat rrisin shkallën e invaliditetit si edhe të vdekshmërisë prej tyre.

Kategoria e pacientëve me risk më të lartë për zhvillimin e osteoporozës përfshin:

Femrat post menopauzë
Femrat me defiçiencë estrogjenike të shkaktuara nga menopauza e hershme (mosha<45 vjeç) ose heqja e dyanshme e vezoreve dhe amenorre (mungesë cikli) premenopauzale e zgjatur(>1 vit)
Pacientë që referojnë se kanë pësuar një frakturë në moshë adulte
Pacentë me fraktura të shumëfishta
Marrja e medikamenteve që dobësojnë kockën( kortizoniket, kimioterapitë etj)
Pacientë me hipertiroidizëm, hiperparatiroidizëm, sëmundje malinje (Myeloma Multiple), Morbus Paget, sëmundje të veshkave etj.
Marrja e pakët e kalciumit dhe Vitaminës D si dhe aktiviteti i ulët fizik
Personat duhanpirës, konsumues të alkoolit

Diagnostikimi

Pas marrjes së hollësishme të të dhënave të pacientit, realizohet Osteodensitometria (DEXA).

DEXA është një ekzaminim i cili nëpërmjet sasive të vogla të rrezatimit , mat dendësinë minerale të kockave të shpinës, legenit, duarve etj. Nëpërmjet këtij ekzaminimi përcaktohen rastet që janë me Osteoporozë dhe nëse kanë risk të lartë për frakturë (paraprihet zhvillimi i frakturës nëpërmjet trajtimit paraprak) si edhe parandalohen rastet të cilat ende nuk kanë zhvilluar sëmundjen, por kanë Osteopeni.

DEXA shërben gjithashtu dhe si monitorues i efikasitetit të terapisë për Osteoporozën (ripërsëritja e ekzaminimit përgjithësisht 1 vit pas trajtimit).

Parandalimi

Për parandalimin e Osteoporozës rekomandohet:

marrja e sasive të duhura të kalciumit e vitaminës D, të paktën gjysma e sasisë të merret nëpërmjet dietës (nevojat ditore llogariten rreth 1000 mg Kalciumit+600 UI Vitaminës D në ditë)
kryerja e të paktën 30 minuta aktivitet fizik në ditë dhe ekspozimi në mënyrë të drejtpërdrejtë në diell
shmangia e disa veseve si duhanpirja apo konsumimi i alkoolit.
korrigjimi i patologjive bazë që çojnë në osteoporozë

Trajtimi

Konsiston në medikamente të cilat merren nga goja, në venë ose gjilpëra nën lëkurë të cilat rrisin dendësinë e kockës dhe ulin riskun për fraktura, e kombinuar me një dietë ushqimore të shëndetshme, ruajtja e peshës trupore dhe kryerja e aktivitetit fizik minimalisht 30 min në natyrë.

Për më shumë informacion ose vizitë me mjeken Reumatologe Ilektra Xhafa kontaktoni në: 042 35 75 35 ose klikoni në: rezervime.spitaliamerikan.com

Spitali Amerikan, përqafoje jetën!

Abuzimi alkoolik, përtej stigmatizimit. Si ta trajtojmë këtë sëmundje….?!

By Spitali Amerikan - Të Reja

Varësia alkoolike është një sëmundje kronike progresive e cila manifestohet nga përdorimi i pakontrolluar i alkoolit, vazhdimi i përdorimit megjithë dëmtimet që shkakton, konsumimi i dozave më të mëdha për të arritur të njëjtin efekt (varësia fizike), si dhe shfaqja e shenjave të tërheqjes (abstinencës) kur e pakësojmë apo ndërpresim përdorimin e tij.

Varësia alkoolike është një stad i agravuar i një sërë problemesh të lidhura me konsumimin e alkoolit. Që nga episodet e veçuara me konsumimin e tepruar ( binge drinking), e deri në abuzimin kronik.
Edhe pse vite më përpara, është etiketuar si “ves mashkullor”, numri i femrave abuzuese të alkoolit sa vjen dhe rritet në vendin tonë. Kjo edhe e shoqëruar me bashkë-konsum të kokainës apo të substancave të tjera psikoaktive. Në këtë mënyrë rritet rrisku për komplikacione të rënda vdekjeprurëse te këta pacientë.

Në shoqërinë shqiptare, ku alkooli shihet si pjesë e rëndësishme e traditës, edhe abuzimi alkoolik në shumë raste nuk njihet apo nuk pranohet. Për më tepër, nuk njihet kufiri midis konsumimit social dhe atij abuziv.
Flasim për përdorim abuziv kur te meshkujt konsumohen më shumë se 4 pije standarde/ditë dhe më shumë se 14/javë, ndërsa te femrat më shumë se 3 pije standarde /ditë apo më shumë se 7/javë.

1 pije standard konsiderohet:
355 ml birrë (me rreth 5% alkool)
148 ml verë (me rreth 12 % alkool)
44 ml pije të forta (me rreth 40% alkool)

A stigmatizohet abuzimi substancior?!

Abuzimi substancior së bashku me sëmundjet e sferës psiqike, janë ndër patologjitë më të stigmatizura nga shoqëria. Kjo çon në diagnostikimin e vonë të sëmundjes dhe si rrjedhojë, shoqërohet edhe me më shumë komplikacione.
Pacientët që vuajnë nga kjo sëmundje, e kanë të pamundur të kufizojnë sasinë e alkoolit, shpesh pijnë vetëm dhe e fshehin këtë fakt; e mbajnë alkoolin në ambiente të ndryshme në shtëpi apo në punë; humbasin interesin për punën, aktivetetet sociale, dhe jo në pak raste bëhen agresivë me familjarët apo shoqërinë.

Alkoolizmi është një sëmundje multisistemike që përveç trurit prek:
• Mëlçinë, duke shkaktuar hepatit alkoolik e deri në cirrozë hepatike-shkatërrim të parikthyeshëm të mëlçisë.
• Traktin tretës, duke shkaktuar gastrit, ulçera, defiçite të vitaminës B nga mospërthithja e saj, dëmtime të pankreasit e deri në Diabet Mellit.
• Sistemin Kardiovaskular, duke shkaktuar rritje të presionit arterial, apo insufiçiencë kardiake
• Gjithashtu abuzimi alkoolik shkakton dëmtime të sistemit imunitar, të syve, të jetës seksuale, defekte në lindje kur përdoret gjatë shtatzanisë, si dhe shton rriskun për sëmundje malinje.

Si të veprojmë në rastet e varësisë alkoolike?

Së pari bëhet vlerësimi me mjekun toksikolog. Pacienti i nënshtrohet ekzaminimeve biokimike (hemogramë, testet hepatike, nivel vitamine B dhe folateve në gjak, etj) për të gjykuar mbi dëmtimet fizike që ka shkaktuar abuzimi alkoolik. Shumë i rëndësishëm është edhe vlerësimi psikologjik, meqë në shumë raste kemi bashkëekzistencën e varësisë alkoolike dhe çrregullimeve psikologjike/psikotike.
Në varësi të gjendjes klinike të pacientit këshillohet detoksikimi në kushte spitalore, pasi abstinenca alkoolike (heqja dore nga alkooli), shoqërohet shpesh me komplikacione fizike, si krizat hipertensive, rrahje të shpeshta zemre, axhitim psikomotor e deri në konvulsione kërcënuese për jetën. Prandaj rekomandohet ndjekje e kujdesshme klinike.
Pas periudhës së detoksikimit fillon terapia e parandalimt të relapsit-rikthimit tek abuzimi me alkool. Dhe për këtë ka preparate specifike të aprovuara si Naltrexoni, Acamprosati, me rrallë Disulfirami. Zgjedhja e preparatit bëhet bazuar në protokolle klinike.

Alkoolizmi mbetet një plagë e rëndë sociale dhe shëndetësore e cila kërkon ndërhyrje multidisiplinare të specializuar. Ndaj duhet të sfidojmë mentalitetin, të pranojmë problemin, dhe të trokasim në derën e duhur.

Për më shumë informacion ose vizitë me mjeken Toksikologe Sonila Bitri kontaktoni në 042357535 ose klikoni në: rezervime.spitaliamerikan.com

Spitali Amerikan, përqafoje jetën!

Si të pastrojmë organizmin pas periudhës festive?

By Spitali Amerikan - Të Reja

Të ushqehemi shëndetshëm gjatë festave ngjan pothuajse një mision i pamundur. Është vërtet e vështirë t’u rezistosh antipastave të shijshme, gjelit të detit të mbushur, bakllavasë… Ushqimet e festave të fundvitit janë padiskutim shumë të shijshme dhe lidhen ngushtë me gëzimin që shoqëron periudhën më të bukur të vitit. Por nga ana tjetër për disa individë, ky tundim i shijshëm i tavolinave festive mund të shkaktojë ankth.

Nutricionistët kanë një lajm të mirë: sipas studimeve gjatë festave shtojmë vetëm përafërsisht gjysmë kilogrami. Megjithatë lajmi i keq është se këtë peshë të shtuar zakonisht nuk e heqim më, pra e shtojmë vit pas viti.

Askush nuk dëshiron të privohet nga kënaqësia që të fal ushqimi i shijshëm gjatë sezonit të festave, as fanatikët e ushqyerjes së shëndetshme, madje as personat që i qëndrojnë strikt numërimit të kalorive. Për këtë arsye ju vijmë në ndihmë me disa këshilla të vlefshme që duhet t’i mbani parasysh, në mënyrë që t’i shijoni festat pa “ndjenja faji” më pas.

Është e rëndësishme të dini t’i thoni “JO”: ushqimeve shumë të yndyrshme, lëngjeve të gazuara dhe me sheqer, salcave të gatshme.
• Pini shumë ujë!
• Përdorni vajin e ullirit ekstra të virgjër.
• Përdorni ëmbëlsues natyralë si stevia.
• Hani çdo tre orë, konsumoni vakte të vogla dhe mos i “ruani vend” stomakut për një super-vakt.
• Konsumoni frutat e stinës: shegën shumë të pasur me antioksidantë, portokallet e pasura me vitaminë C.
• Shmangni alkoolin me tepricë, konsumoni maksimumi 1-2 gota verë të kuqe në ditë.
• Konsumoni një grusht fruta të thata para se të uleni në tavolinë për vaktin kryesor. Ato janë të pasura me fibra dhe proteina dhe do t’ju ndihmojnë të ndjeheni të ngopur për më gjatë.
• Mundohuni të vini trupin në lëvizje, qoftë edhe me vetëm 30-40 minuta ecje në ditë.

Nëse këto këshilla nuk i zbatojmë plotësisht ??

Zgjidhja
Pastroni organizmin tuaj me dietën e detoksifikimit per 14 ditë të përshkruar më poshtë:

E Hënë
Mëngjesi -1 Gotë smoothie i të hënës
Smothie i të hënës
1/4 ananas, një portokall, 1 filxhan çaji gjethe spinaqi, 1 filxhan qumësht me zero yndyrë/qumësht bimor dhe një lugë kafe pluhur moringa, një lugë çaji mjaltë
Mesditë – 1 gotë smoothie i të hënës
Dreka – supë perimesh dhe fileto pule në avull
Pasdite – 1 mollë
Darka – perime të ziera dhe një vezë e zier

E Martë

Mëngjesi: 1 gotë smoothie i të martës
Smoothie i të martës: 1 kivi, një filxhan çaji me brokoli, një mollë jeshile, 1 filxhan qumësht me zero yndyrë/qumësht bimor, 1 lugë çaji mjaltë dhe 1 lugë kafe tumerik
Mesditë – 2 kivi
Dreka – Sallatë lakër e bardhë/e kuqe dhe karrotë dhe fileto peshku
Pasdite – 1 gotë smoothie i të martës
Darka – Një pjatë thjerrëza

E Mërkurë

Mëngjesi – 1 gotë smoothi i të mërkurës
Smoothie i të mërkurës:
¼ mango, 1 portokall, 1 filxhan çaji kastravec i prerë,1 lugë gjelle fara lini, 1 filxhan çaji gjethe spinaqi, 1flilxhan çaji kos pa yndyrë, 1 lugë çaji mjaltë
Mesditë – 1 mollë jeshile
Dreka – rizoto me perime dhe fileto pule në avull
Pasdite – 1 gotë smoothie i të mërkurës
Darka-supë pule

E Enjte

Mëngjesi – 1 Gotë lëng selinolje me mollë jeshile dhe limon
Mesditë – 3-4 mandarina
Dreka – supë brokoli dhe peshk me perime
Pasdite – 2-3 kivi
Darka-sallatë çezar

E Premte

Mëngjesi – Sallatë frutash (1/4 ananas,1/2 banane dhe ½ mollë dhe një luge çaji mjaltë dhe pak pluhur kanelle)
Mesditë 1 gotë lëng shege
Dreka – Fasule dhe sallate spinaqi
Pasdite – 4-5 arra
Darka – 2 vezë omëletë (me perime sipas dëshirës)

E Shtunë
Mëngjesi – lëng molle-panxhar-karrote
Mesditë – 2 kivi
Dreka – supë patate-finokio dhe role pule me perime sipas dëshirës
Pasdite – 10 bajame
Darka – Supë legume (bishtajore-fasule, bizele, thjerrëza, soja)

E Diel
Mëngjesi – një tas kos pa yndyrë me boronica, një lugë gjelle tërshërë dhe 1 lugë çaji mjaltë.
Mesditë – 1-2 kivi
Dreka – supë kungull-karrotë dhe fileto pule në avull me brokoli dhe lulelakër
Pasdite -1 banane
Darka – perime të ziera

Konsumoni:
Çajra bimorë me shumicë gjatë ditës, (5-6 filxhanë)
erëza me shumicë
si additive limon jo uthull në sallata
sasi të limituara yndyre dhe kripe

Për një detoks akoma më specifik dhe tërësor të organizmit zgjidhja është: Hidrokolonterapia!

Gjithmone fuqia pastruese e ujit është përdorur për qëllime kuruese. Në naturopati veçorite e ujit përdoren dhe për të pastruar zorrën e trashë, pikërisht me hidrokoloterapi, një lavazh i zorrës mirëbërës që ka si qëllim të eleminojë mbeturinat dhe toksinat: ndihmon të detoksikohemi, të shfryjmë barkun, të luftojmë shqetësimet e zorrëve dhe të zgjidhim shumë probleme të tjera shendetësore, edhe ato që nuk janë të lidhura drejtpërdrejtë me zorrën e trashë.

Pa dhembje dhe pa përdorur medikamente: hidrokolonterapia është një ilaç natyral i bazuar në pastrimin e zorrës së trashë

Përse bëhet?

Çdo ditë mbetjet dhe toksinat, që lidhen me të ushqyerit dhe stresin, e helmojnë zorrën e trashë që humbet kështu një pjesë të funksionit. Të gjitha këto që depozitohen në zorren tonë të trashë mund të jenë shkak i shumë patologjive të pjesëve të ndryshme të trupit tonë, si p.sh aparati i frymëmarrjes, lëkura, sistemi nervor dhe aparati tretës.

Hidrokolonterapia lejon eleminimin e të gjitha mbetjeve që janë depozituar në muret e zorrës sonë si: qeliza të vdekura epiteliale, materiale fekale, mbetje që irritojnë zorrën, toksina, parazitë dhe substanca të tjera të dëmshme për organizmin tonë. Eleminohen ndër të tjera dhe gazrat prezente në brendësi të zorrës së trashë.

Zorra e pastruar rigjen funksionimin e saj optimal, duke favorizuar imunitetin natyral dhe duke riekuilibruar procesin e asimilimit dhe eleminimin e substancave, duke rregulluar kështu harmoninë e brendshme dhe për pasojë përmirësohet shëndeti i përgjithshëm i individit.

Material i përgatitur nga Departamenti i Laboratorëve dhe Nutricionit në Spitalin Amerikan. Dr.Sh.M Albana Daka

Spitali Amerikan, përqafoje jetën!

I ri dhe pa flokë?! Mos u dekurajoni, D.H.I në Spitalin Amerikan është zgjidhja juaj!

By Spitali Amerikan - Të Reja

Kur flokët fillojnë të bien në një moshë të re, është e vështirë të dish se çfarë duhet të bësh. Thjesht e lë të ndodhë, apo fillon trajtimet? Alopecia androgjenetike është përgjegjëse në shumicën e rasteve për humbjen e flokëve. Mund të fillojë në moshë madhore, por ndonjëherë dhe në adoleshencë. Kur rënia e flokëve fillon shumë herët, pasojat psikologjike janë shkatërruese. Çfarë duhet të bëni kur filloni të humbisni flokët në moshë të re? Cilat janë opsionet e trajtimit? A duhet të kryeni transplantin e flokëve? Cilat medikamente funksionojnë?

Shkaqet e Rënies së Flokut në Moshë të Re

Shkaqet mund të jenë të shumta si: stresi, shoku post traumatik, mungesat e vitaminave apo lëndëve ushqyese, problemet e tiroides, mjekimet medikamentoze etj. Në këto raste, rënia është e menjëhershme dhe duhet konsultuar me mjekun specialist përkatës në mënyrë që të trajtohet shkaku.
Alopecia androgjenetike në anën tjetër është rezultat i një ndjeshmërie gjenetikisht të përcaktuar të folikujve ndaj Dihidrotestosteronit. Rreth 25% e meshkujve midis 25-30 vjeç preken nga alopecia androgjenetike, dhe rreth 20% e meshkujve në të 20-tat.

Ecuria e Rënies së Flokut

Së pari duhet të kuptojmë çfarë është Alopecia Androgjenetike dhe përse ndodh. Cili është shkaku i këtij problemi? Shkaktarët janë hormonet dhe trashëgimia. Në trupin e njeriut testosteroni kthehet në dihidrotestosteron, hormon i cili te njerëzit gjenetikisht të “programuar”, e sulmon folikulin e flokut njësoj si një helm. Ky sulm vret dalëngadalë rrënjën e flokut, e dobëson flokun dhe gradualisht shkakton rënien e tij.
Lidhja midis testosteronit dhe rënies së flokut u theksua nga Hamiltoni, i cili ishte mjeku i parë që krijoi një shkallë që përfaqëson fazat e ndryshme të rënies së flokut. Rënia e flokut si patologji është beninje, jo me dëme për shendetin, por me një efekt të dëmshëm real në vetëvlerësimin dhe psikologjinë e individit. Nëse jeni të prekur nga Alopecia androgjenetike është vështirë ta evitoni, por për fat ka zgjidhje në formën e trajtimeve për një mjekim të saktë të kësaj patologjie.

Grackat që duhen shmangur

Kur humbet flokë në moshë të re, vuajtja mund të jetë më e madhe sesa në moshat 30 apo 40 vjeç. Kështu që dëshpërimi për një shërim të shpejtë bën që të bini pre e premtimeve të gënjeshtërta. Bëni kujdes !!!!

Produktet e “magjishme” për kurim:

Një në dy meshkuj në të 50-tat preket nga rënia e flokut, me fjalë të tjera tregu është shumë i madh. Një mori kurash të “magjishme” ofrohet për burrat (apo dhe gratë) që vuajnë nga rënia e flokut, si: locione, shampo, suplemente ushqimore etj, të cilat shoqërohen me fushata marketingu. Shumica e këtyre produkteve nuk e dëmtojnë shëndetin, por nuk e zgjidhin problemin. Në rastin më të mirë do keni një përmirësim të pamjes së flokut, por rënia nuk do të ndalet.

Metodat e “dala nga moda” të transplantit të flokut:

Një numër i madh klinikash vazhdojnë të ofrojnë teknika invazive dhe agresive si “FUT” apo “Strip”, të cilat rezultojnë me shenja apo rezultate shumë të varfëra. Me metodën DHI (Direct Hair Implantation), transplanti i flokut ka evoluar: kryhet me anestezi të thjeshtë lokale, virtualisht pa dhembje, me një rezultat jo vetëm të dendur dhe natyral, por gjithashtu pa shenja, i cili realizohet dhe pa e rruajtur kokën.

Transplantet e lira jashtë shtetit :

Nuk është hera e parë që i kemi paralajmëruar njerëzit për rreziqet e transplanteve të lira. Ato klinika që i ofrojnë, bëjnë pre të tyre njerëz shumë të prekur nga rënia e flokut dhe për pasojë “të gatshëm për të kryer gjithçka”. Në moshë të re, financat janë ato që konsiderohen më shumë kur flitet për transplant, por ju lutem tregohuni të kujdesshëm. Të marrësh një vendim të tillë duke u bazuar vetëm tek financat mund të jetë një katastrofë. Këto klinika do mundohen t’ju shesin një maksimum të numrit të folikujve, por rrallë flasin për rëndësinë e ruajtjes së zonës dhuruese të flokut, që është akoma më thelbësore në mosha të reja ku transplante të tjera në faza të mëtejshme të jetës mund të jenë të nevojshme. Mënyrat e tepruara (numër folikujsh shumë më shumë sesa nevoja), agresive (mjete invazive për heqjen dhe vendosjen e folikujve) apo të kryera nga persona të paspecializuar kanë dy pasoja madhore:
1- Dëmtimi i zonës dhuruese e privon pacientin nga marrja e folikujve për përdorim në të ardhmen. Kur pacienti është i ri, pritet që rënia e flokëve të vazhdojë, kështu që zona dhuruese është rezervë për transplante në të ardhmen.
2- Folikujt e ekstraktuar në mënyrë agresive dëmtohen, gjë e cila çon në ulje të përqindjes së rritjes së flokut pas mbjelljes, shumë më e ulët se 70%.

Opsionet e trajtimit

Me përgatitje dhe planifikim është e mundur të evitohet rënia totale e flokëve. Hapi i parë i rëndësishëm është të konsultoheni me një specialist të fushës i cili duhet të vlerësojë rastin tuaj individualisht dhe të rekomandojë trajtimet e duhura sipas nevojës tuaj. Është thelbësore që të parashikohet si do të vazhdojë rënia për të menaxhuar në mënyrë korrekte zonën dhuruese.

Transplanti i flokut D.H.I

D.H.I (Direct Hair Implantation) është absolutisht i sigurt dhe garanton 100% rezultate natyrale. Implantimi kryhet me një mjet të veçantë, Implanterin D.H.I, i cili ka një diametër më të vogël se 1 mm, dhe u lejon mjekëve specialistë të kontrollojnë këndin, drejtimin dhe thellësinë e flokut të implantuar, gjë që bën diferencën nga çdo teknikë tjetër për mbjelljen e flokut. D.H.I përdor gjithashtu një teknikë mbjelljeje të patentuar, teknika më delikate që ekziston aktualisht dhe ky kombinim bën që përqindja e rritjes së flokut të implantuar të jetë mbi 90%. Rezultati final duket 1 vit pas procedurës kështu që është thelbesore të kryeni rikontrollet sipas udhëzimit pranë klinikës dhe klinicistit që ka kryer teknikën.

Minoxidili

Minoxidili përdoret në formën e solucionit topikal, me përdorim lokal në lëkurën e kokës, si medikament që trajton rënien e flokut. Të rinjve që vuajnë nga alopecia e hershme ju rekomandohet në mënyre që të ruhet floku i tyre dhe të ngadalësohet rënia për aq gjatë sa të jetë e mundur.

Finasteridi

Fillimisht i përdorur për meshkujt të cilët kanë një sasi rezervë të flokut, Finasteridi mund të përdoret i vetëm ose si shtesë për transplantin e flokëve. Është një medikament i cili merret nga goja në formë tabletash, dhe vepron duke ndaluar kthimin e Testosteronit në Dihidrotestosterone, duke parandaluar kështu dëmtimin e folikujve të flokëve. I përdorur për një periudhë 5 vjeçare, trajtimi me Finasteride ndihmon në stabilizimin e rënies së flokut në shumicën e rasteve. Sidoqoftë për të ruajtur efektin terapeutik rekomandohet përdorimi i vazhdueshëm. Nëse trajtimi ndalohet, rezultatet pozitive gradualisht pakësohen dhe rënia e flokëve rifillon.

Finasteride nuk mund të merret pa rekomandimin e mjekut. Efektet anësore janë të rralla, por duhen raportuar direkt te mjeku juaj.

Terapia me PRP

Një alternativë për locionet e përditshme apo për tabletat e medikamenteve është PRP ( Platelet Rich Plasma), metodë trajtimi që përdor vetë qelizat e organizmit për stimulimin e rritjes së flokut. Është minimalisht invazive dhe mund të ketë efekt si në forcimin e folikujve të flokut, ashtu dhe në zgjimin e folikujve të “fjetur” të cilët eventualisht rrisin flokë të rinj.

Hapat e mëtejshëm

Nëse vuani nga rënia e flokëve në moshë të re, mos u dekurajoni, sepse zgjidhje ka. Flisni me një specialist të D.H.I dhe rifitoni vetëbesimin e humbur.

Kujdes! “Direct Hair Implantation” si metodë ofrohet vetem në qendrat D.H.I, dhe në Shqipëri e vetjma qendër D.H.I ndodhet pranë Spitalit Amerikan 3. Për të prenotuar konsultën falas telefononi në: +355 68 6000 900.

SPOK (Sëmundja Pulmonare Obstruktive Kronike)

By Spitali Amerikan - Të Reja

ÇFARE DUHET TE DIME PER SPOK-un?

Sëmundja Pulmonare Obstruktive Kronike (SPOK, COPD) është një sëmundje (patologji) që prek mushkëritë dhe mund të parandalohet. Karakterizohet nga një ngushtim (obstruksion) i parikthyeshëm ose pjesërisht i rikthyeshëm i rrugëve ajrore. Ky obstruksion zakonisht është progresiv dhe shoqërohet me një përgjigje inflamatore jo normale kronike të mushkërive kundrejt grimcave të pluhurit dhe/ose gazeve si psh: monoksidi i karbonit prezent në tymin e duhanit dhe dioksodi i karbonit që gjendet në ajrin e ndotur të ambientit që na rrethon. SPOK-u është shkaktari i tretë i vdekjeve në të gjithë botën dhe shkaktari i dytë që akuzohet për invaliditet të plotë të pacientëve. Në vitin 2010 janë raportuar mbi tre milionë vdekje nga kjo sëmundje në rang botëror. Në Shqipëri kjo patologji nuk njihet mirë dhe si rrjedhojë ngelet e padiagnostikuar dhe/ose e keqtrajtuar. Studimet tregojnë që vendi ynë ka një prevalencë të lartë të SPOK-ut, duke prekur përafërsisht 5-6% të popullatës.

1- Cilët janë shkaktarët e kësaj sëmundje?

Duhanpirja është shkaku kryesor dhe më i zakonshëm. Njihen edhe faktorë të tjerë ndër të cilët përmenden: ndotja e ambientit, defiçitet e α1-antitripsinës, mosha, dieta ushqimore dhe aktiviteti i pakët fizik.

2. Cilat janë shenjat dhe simptomat që shoqërojnë këtë sëmundje?

Kolla kronike me sekrecione dhe vështirësia në frymëmarrje kryesisht gjatë ecjes (efortit), janë më të shpeshtat në këtë sëmundje. Preken më tepër meshkujt > 40 vjeç duhanpirës, por kohët e fundit po shtohet edhe numri i femrave me SPOK si rrjedhojë e duhanit.

3. Si diagnostikohet?

Diagnoza vendoset me anë të një testi të thjeshtë që quhet Spirometri me provën me bronkodilatatore (ventoline). Çdo subjekt me moshë mbi 40 vjeç mashkull ose femër, me ose pa ankesa, i rekomandohet të kryejë këtë egzaminim. Nëse pacienti diagnostikohet me SPOK duhet të përcaktohet grada e sëmundjes, që janë A,B,C,D (stadi I,II,III,IV).

4. Cilat janë alternativat e trajtimit të kësaj sëmundje?

Duhet inkurajuar ndërpreja e pirjes së duhanit. Plani i mjekimit përcaktohet në varësi të gradës (stadit). Grada e parë nuk kërkon mjekim të vazhdueshëm, por vetëm në rast se pacienti ka ankesa. Gradat e tjera kërkojnë mjekim më të gjatë. Mjekimi në përgjithësi konsiston fillimisht në ndërprerjen e pirjes së duhanit nga ana e pacientit dhe në përdorimin e medikamenteve që merren në formë inhalatore (në formë pompe) për një kohë të gjatë, por kjo në varësi të stadit të sëmundjes dhe gjendjes së përgjithshme të pacientit (sëmundjet shoqëruese).

SPOK është një sëmundje që nëse prek një person nuk mund të shërohet më. Mjekimi ka për qëllim frenimin sadopak të sëmundjes në stadin që diagnostikohet. Ndërlikimet e sëmundjes janë të shumta si psh: kardiake, endokrinologjike, muskulare, deri në invalidizim të plotë të pacientit.

Për më shumë informacion ose vizitë me mjeken Pneumologe Jolanda Nikolla kontaktoni në 042357535 ose klikoni në: rezervime.spitaliamerikan.com

Spitali Amerikan, përqafoje jetën!

Analiza gjenetike për herë të parë në Shqipëri

By Spitali Amerikan - Të Reja

Për herë të parë në Shqipëri, duke filluar nga vitit 2019 do të mundësohet kryerja e disa analizave, realizimi i të cilave deri në këto momente bëhej vetëm jashtë vendit. Janë analizat gjenetike, aq të rëndësishme në parandalimin e disa sëmundjeve dhe tepër ndihmuese në trajtimin dhe gjetjen e terapive individuale për pacientë me sëmundje të rënda.

Kjo risi bëhet realitet falë një investimi të ri të Rrjetit Laboratorik të Spitalit Amerikan. Ky rrjet që sot është më i madhi në Shqipëri, numëron 22 laboratorë në të gjithë vendin e madje edhe në Prishtinë.

Drejtore e këtij laboratori, Dr. Albana Daka na shpjegon më tepër mbi këtë risi dhe saktësinë e analizave në rrjetin e laboratorëve që ajo drejton.

Gjatë një periudhe 12 vjeçare të punës në American Hospital, qe prej çeljes se Spitalit te pare Amerikan ne dhjetor te vitit 2006, Departamenti i Laboratorit klinik – biokimik, imunologjik, mikrobiologjik dhe patologjik ka kryer suksesshëm suportin laboratorik të pacientëve ambulatorë & hospitalierë, në parandalimin dhe diagnostikimin e patologjive të ndryshme, me protokolle të pacientëve që nga emergjencat, pacientët pre-operatorë, të kimioterapisë, të hemodializës e deri në pacientët post-transplant.

Rrjeti i parë laboratorik në Shqipëri, i çertifikuar me ISO 15189;2012, standardin më të lartë të cilësisë.

Laboratori ofron një gamë tepër të gjerë ekzaminimesh laboratorike: 1600 ekzaminime të ndryshme referuar literaturës botërore dhe realizim sipas të gjitha standardeve ndërkombëtare.

Që në fillimet e tij ky laborator u konceptua dhe u ndërtua me teknologjinë më të fundit në fushën laboratorike totalisht automatike, me identifikim dhe barkodim të pacientit që në hyrje të tij.

Këto aparatura tërësisht automatike minimizojnë në maksimum gabimet që sjellin metodat e mëparshme manuale. Bashkëngjitur kësaj teknologjie është dhe pajisja e këtij laboratori me sistemin informatik laboratorik që shmang gabimet njerëzore në ngatërrimin e mostrave të gjakut të pacientëve dhe njëkohësisht në arkivimin e të gjithë rezultateve laboratorike të çdo pacienti. Këto rezultate janë të mundshme në çdo moment kur pacientit i nevojiten ato për informacion të gjëndjes së tij shëndetësore, për qëllime krahasuese të rezultateve laboratorike pre dhe post-terapeutike.

Rrjeti laboratorik është i shtrirë në 9 njësi të Spitalit Amerikan në Tiranë, Fier, Durrës e Prishtinë dhe në 13 Laboratore satelite.

Në American Lab Network (ALNet) do të gjeni:

-Gatishmëri në shërbimin laboratorik 24 orë në çdo ditë të javës
-Çmime të favorshme për të gjitha llojet e ekzaminimeve dhe shërbimeve
-Oferta dhe paketa të vazhdueshme mbi ekzaminime të ndryshme për të gjitha grupmoshat.

Spitali Amerikan, përqafoje jetën!

Reduktoni dhjamin pa bisturi dhe pa dhembje… Metoda revolucionare për reduktimin e indit dhjamor në Klinikën Vivia

By Spitali Amerikan - Të Reja

ZELTIQ COOLSCULPTING është një trajtim jo-invaziv që përdor teknikën innovative të ftohjes të quajtur Cryolipolysis për të vepruar mbi qelizat kokëforte të dhjamit në zonat më problematike të trupit.

Kjo metodë eshtë zbuluar nga shkencëtarët e njohur të Universitetit të Harvardit, Manstein dhe Anderson të cilët ishin të parët që vunë re ndjeshmërinë e qelizave dhjamore ndaj të ftohtit dhe shkatërrimin e tyre pas ekspozimit në temperatura të ulëta. Pikërisht kjo ide është baza e funksionimit të procedurës Zeltiq.

Zeltiq është një procedurë jokirurgjikale e aprovuar nga FDA, e sigurt dhe efektive në eleminimin e dhjamit të tepërt, që nuk ka nevojë për anestezi, prerje apo bisturi. Trajtimi zgjat vetëm një orë për një zonë të caktuar. Zonat më të përshtatshme për trajtim janë barku (pjesa mbi dhe nën kërthizë), ijet, shpina, pjesa e brendshme e kofshëve dhe krahët.

Pacientët zakonisht bëjnë dhe dy trajtime njëkohësisht, psh dy anët e belit ose dy pjesët e brendshme të kofshëve. Gjatë procedures shkatërrohen 20% deri 40% e qelizave dhjamore. Këto qeliza do të largohen nga zona e trajtuar nëpërmjet qarkullimit të gjakut dhe atij limfatik gjatë javëve në vazhdim. Pas procedurës, vihet re një skuqje e lëkurës në zonën e trajtuar, e cila largohet përreth 20 minuta. Rezultatet bëhen të dukshme në fund të javës së tretë, arrijnë maksimumin pas dy muajve dhe vazhdojnë të përmirësohen deri në katër muajt në vazhdim.

Pas kësaj kohe rekomandohet të kryhet një konsultë me mjekun për krahasimin e rezultateve. Trajtimi është i padhimbshëm dhe pacienti ndihet tepër komod gjatë tij madje mund ti kthehet menjëherë aktivitetit normal.

Gjithashtu trajtimi nuk shkakton varje të lëkurës, madje në disa zona si psh pas operacioneve cezariane ndihmon në zhdukjen e palosjes së lëkurës që krijohet në pjesën e poshtme të barkut.

Zeltiq ofrohet në mënyrë ekskluzive vetëm në Klinikën Vivia ku janë trajtuar me dhjetëra raste në mënyrë të suksesshme. Kjo metodë nuk duhet kosideruar si një trajtim për të rënë në peshë apo për të luftuar obezitetin. Pacienti që i nënshtrohet procedurës, zakonisht e ka peshën nën kontroll por kërkon zgjidhje për akumulimet dhjamore në zonat problematike.

Zeltiq-Coolsculpting është e vetmja procedure jo-kirurgjikale e aprovuar nga FDA që bazohet në ngrirjen e kontrolluar të qelizave dhjamore për eleminimin e depozitave dhjamore që i rezistojnë dietës dhe ushtrimit fizik. Rezultatet janë të dukshme, të provuara dhe të qëndrueshme në kohë. Pacientët mund të rikthehen në aktivitetin normal brenda së njëjtës ditë duke e bërë këtë procedurë një zgjedhje ideale për personat që kërkojnë një alternativë jokirurgjikale të liposuksionit.

Kalkuloza Renale (gurët në veshka) dhe trajtimi ureteroskopik

By Spitali Amerikan - Të Reja

Kalkuloza Renale apo gurët e traktit urinar është një patologji e zakonshme e karakterizuar nga prania e substancave të ngurta të formës dhe strukturave të ndryshme që depozitohen në brendësi të veshkës, traktit urinar ose fshikëzës së urinës. Kjo sëmundje prek të gjitha moshat, por është më e shpeshtë tek ato 30-45 vjeç, dhe më e përhapur te meshkujt. Nëse nuk ndërhyet në kohë është i madh rreziku për insufiçiensë renale.

Simptomat:

1. Dhembje abdominale ose në shpinë

2. Ndryshim i ngjyrës së urinës

3. Urinim të shpeshtë dhe me dhembje

4. Simptoma të ngjashme me gripin

5. Gjak gjatë urinimit

6. Infeksione në traktin urinar

Nxjerrja e gurit me metodën ureteroskopike është shumë efikase, ka më pak dhembje krahasuar me kirurgjinë e hapur, nuk lë shenjë, rreziku i komplikacioneve është tepër i ulët dhe ka një periudhë hospitalizimi shumë të shkurtër. Kjo metodë konsiston në futjen e një aparati të hollë të quajtur ureteroskop nëpërmjet uretrës në fshikzën e urinës dhe më pas në uretër. Mjeku nxjerr gurin duke përdorur endoskopin ose përdor rreze lazer për ta thërmuar atë. Në Departamentin e Urologjisë në Spitalin Amerikan realizohet trajtimi me metodat më moderne të sëmundjes së gurëve në sistemin urinar.

Për më shumë informacion ose vizitë me mjeken kirurge urologe Evisa Zhapa kontaktoni në 042357535 ose klikoni në: rezervime.spitaliamerikan.com

Refluksi urinar dhe trajtimi endoskopik

By Spitali Amerikan - Të Reja

Refluks Vezikoureteral (VUR) është kthimi mbrapsht i urinës nga fshikëza e urinës drejt veshkave. Normalisht urina zbret nga veshkat, shkon drejt fshikëzës urinare dhe pacienti zbraz fshikëzën për të urinuar. Mund të ndodhë që urina të kthehet mbrapsht gjatë urinimit ose në fazat e qetësisë, pra kur pacienti nuk është duke urinuar. Zakonisht është një problem që prek fëmijët, shkakton infeksione urinare dhe temperaturë të lartë. Nëse nuk kapet në kohë mund të sjellë pasoja të rënda te veshkat ndaj nevojitet trajtimi përkatës tek mjeku specialist.

Endoskopia është procedura më efikase për trajtimin e kësaj patologjie. Në këtë teknikë një substancë (polimeret e acidit hialuronik) injektohet në valvulën e dëmtuar që ndodhet midis ureterit dhe vezikës. Rezulati i këtij trajtimi i afrohet shumë rezultatit që jep trajtimi me kirurgji të hapur, por ndryshe nga kjo e fundit endoskopia është një procedurë pa dhembje dhe hospitalizimi është shumë i shkurtër.

Për më shumë informacion ose vizitë me mjeken kirurge urologe Evisa Zhapa kontaktoni në 042357535 ose klikoni në: rezervime.spitaliamerikan.com

Kongresi Ndërkombëtar Multidisiplinor Mjekësor, katër vite suksesi

By Spitali Amerikan - Të Reja

Për tre ditë kryefjala e mjekësisë në vend ka qenë Kongresi i IV-ët Ndërkombëtar Multidisiplinor Mjekësor. I organizuar nga Spitali Amerikan me mbështetjen e Ministrisë së Shëndetësisë dhe Ministrisë së Arsimit, Sportit dhe Rinisë dhe partnerëve të tjerë, kongresi që u mbajt në datat 15-16-17 nëntor edhe këtë vit regjistroi mbi 2000 pjesëmarrës. Për tre ditë, Tirana u kthye në një qendër të rëndësishme të Edukimit Shkencor dhe Akademik, ku elita e mjekësisë mbarëshqiptare dhe personalitete të shëndetësisë nga 25 vende të botës sollën risitë, protokollet dhe trajtimet më inovative të mjekësisë së ditëve të sotme, si dhe shkëmbyen eksperienca dhe informacione nga fusha e shëndetësisë.

Një vit i tërë pune kolosale për të mbërritur në një “festival mjekësor” të nivelit europian, që frymëzon dhe motivon për sfida të reja. “Kongresi i IV-ët është një kongres pa kufij, është kongresi që mbledh vëllezërit shqiptarë kudo ku janë në të gjithë Ballkanin dhe personalitete të shquara të mjekësisë botërore. Një mundësi e artë trajnimi për të gjitha hallkat e strukturës shëndetësore, një dritare edukimi që nxit përmirësimin e vazhdueshëm, dhe në këtë sens themi që jemi krenarë për atë që kemi arritur”, u shpreh Presidentja e “IMCA”-s, Dr.Shkc. Lindita Shosha.

“Përmirësimi i vazhdueshëm i cilësisë në kujdesin shëndetësor dhe sigurinë e pacientit”, ishte fokusi kryesor i këtij Kongresi, që solli 28 seanca shkencore në disiplina të ndryshme të mjekësisë, 6 “workshop”- e, simpoziume dhe dy tavolina të rrumbullakëta mbi strategjitë e përmirësimit të Sistemit Shëndetësor dhe Turizmin Mjekësor.

Ceremonia hapëse e Kongresit, ku përshëndeti edhe Ministrja e Shëndetësisë Ogerta Manastirliu, u pasua nga seksioni plenar mbi tendencat e fundit në kirurgjinë mini-invazive, për një cilësi më të mirë në kujdesin shëndetësor dhe sigurinë e pacientit.

Vlerësimi dhe mbështetja e studentëve të ekselencës në Mjekësi ishte nisma që u zbulua në ceremoninë hapëse të Kongresit . Një nismë e ndërmarrë nga CEO i Spitalit Amerikan Dr.Klodjan Allajbeu, që i ofroi bursa falas 3 studentët më të mirë të Mjekësisë. Pas konkursit dhe shqyrtimit të dokumentacionit përkatës, Komisioni i Vlerësimit të Bursave, i përbërë nga personalitete të mjekësisë shqiptare, përzgjodhi studentet Juvenilja Kodra, Alisia Velaj dhe Sara Ricku, të cilat do të përfitojnë bursë mujore deri në përfundim të studimeve universitare. Dr.Klodjan Allajbeu theksoi se kësaj nisme, që do të vijojë me të tjerë studentë në vitet e ardhshme, do t’í bashkohet edhe Spitali Hygea që do të japë të njëjtin numër bursash, si dhe mjekët specialistë që gjithashtu janë shprehur të gatshëm të kontribuojnë në fondin në mbështetje të studentëve më të mirë të Mjekësisë, në rrugën e bukur dhe të vështirë të dijes.

Në këtë kongres u vlerësuan me çmime dhe 6 figura ekselente të mjekësisë shqiptare dhe asaj botërore. Një dokumentar “In Memoriam” dhe një nderim i veçantë me “Çertifikatën e Mirënjohjes” iu dedikuan “Bisturisë së Artë” Prof.Flamur Tartarit për kontributin e tij të çmuar në mjekësinë shqiptare dhe edukimin e brezave të rinj.

Kongresi Ndërkombëtar Multidisiplinor Mjekësor shënoi sukses për të katërtin vit radhazi. Një arritje që rrit besimin dhe motivon për të ecur përpara dhe për të kontribuar gjithmonë e më shumë në shkencën që i shërben jetës.

Page 3 of 7‹1 234 5 ›»