Spitali Amerikan, Author at American Hospital

“Stroke”: Kur çdo minutë vlen jetë!

Stroku (goditja në tru) ndodh atëherë, kur një pjesë e trurit ndalon së funksionuari ose nuk e kryen funksionin e tij të plotë. Kur truri ndalon së furnizuari me oksigjen, e që në shumë pak minuta qelizat e trurit fillojnë të vdesin. Stroke do të thotë urgjencë, ndaj trajtimi i duhur mjekësor në kohë minimizon dëmtimet e trurit, si dhe ul shansin e pasojave që lë kjo sëmundje.

Lajmi i mirë është se tashmë kjo sëmundje mund të trajtohet dhe parandalohet. Në ditët e sotme, sipas statistikave, numri i personave që humbin jetën nga goditja në tru është reduktuar ndjeshëm.

Simptomat

Është e rëndësishme që të gjithë të njihen me simptomat e Stroke. Kjo i shërben atyre dhe njerëzve të tyre të afërt. Shenjat e para se si të dallojmë një person të prekur nga stroke janë:

Probleme me të folurin dhe të kuptuarin. Ndodh kur një person shfaq shenja në mos artikulimin e fjalëve në formën e duhur apo vonesë në të kuptuar, konfuzitet dhe përhumbje.
Paralizë e gjysmës së fytyrës, këmbës apo dorës. Kjo ndodh kur papritmas një person ndjen mpirje, këputje, paralizë të fytyrës, krahut apo këmbës. Zakonisht kjo ndodh në një pjesë të trupit të pacientit që ka pësuar stroke. Për të kuptuar nëse kjo është një goditje në tru, provoni të ngrini sipër kokës të dy krahët. Nëse njëri prej tyre bie poshtë dhe nuk e komandoni dot mund të jetë një shenjë e goditjes në tru.
Probleme me shikimin; me një ose të dy sytë. Papritur personi i prekur nga Stroke, mund të ketë shikim të turbullt, errësirë apo shikim të dyfishtë në njërin apo në të dy sytë.
Dhembje koke. Dhembja e kokës është një shenjë e Stroke gjithashtu. Dhembja e kokës fillon duke u shoqëruar me të vjella dhe marrje mendsh.
Vështirësi në të ecur. Të prekurit nga Stroke humbin ekuilibrin në qëndrim dhe ecje.

Kur duhet të njoftojmë urgjencën?

I prekuri nga Stroke ka nevojë për trajtim të menjëhershëm. Drejtojuni mjekut edhe nëse vëreni që shenjat janë zhdukur. Është e rëndësishme të kryeni testet si më poshtë:

Kërkojini personit të buzëqeshë; vëreni nëse njëra anë e buzës bie.
Krahët. Ngritja e krahëve njëkohësisht; vëreni nëse ai rrëzohet pavetëdije
E folura. Tentoni të flisni me personin që dyshoni se ka pësuar goditje. Vëreni nëse e folura e tij është e paqartë dhe e çuditshme.

Nëse një i afërmi juaj shfaq këto shenja, mos prisni që simptomat të kalojnë, por menjëherë drejtohuni qendrës së urgjencës. Çdo minutë kushton, sa më shumë kohë të kalojë, aq më shumë rritet risku i vdekjeve nga stroke.

Përse ndodh Stroke?

Sepse 1.9 milion qeliza nervore të trurit vdesin në minutë. Bllokimi i arteries kryesore të madhe të trurit çon në 120 milionë qeliza të vdesin në 1 orë dhe në rast mos zhbllokimi të arteries, riperfuzionit të zonës çdo 30 minuta, probabiliteti i përmirësimit pas goditjes ulet me 10%.

Qendra e Stroke në Spitalin Amerikan

Spitali Amerikan çdo muaj pret një numër të madh rastesh të të prekurve nga Stroke (goditjet në tru). Vlen të theksojmë se goditjet në tru janë të rrezikshmet, në rast se pacienti humbet dhe 1 minutë kohë më shumë nga çasti i goditjes.

Në Spitalin Amerikan kemi ngritur zinxhirin e organizimit të sistemit të Stroke në mënyrën më efektive për pacientin dhe ekipin mjekësor që e asiston atë. Në këtë qendër vlerësim maksimal merr koha, si faktori primar i shpëtimit të jetëve nga goditjet në tru. Pas telefonatës në nr. e urgjencës 042357535/0688008000 ekipi i mjekëve të njësisë Stroke nisen menjëherë drejt vendndodhjes së pacientit, duke asistuar me të gjitha mënyrat e duhura mjekësore për t’u siguruar se gjendja e pacientit nuk është përkeqësuar deri në momentin që ata e sjellin atë pranë urgjencës së Spitalit Amerikan. Kur pacienti mbërrin në spital kryhet një zinxhir ekzaminimesh, duke filluar nga analizat e gjakut e deri te rezonanca e kokës, për të parë tipin e Stroke. Kur rastet e pacientëve janë të komplikuara, ata i nënshtrohen kirurgjisë së menjëhershme. Në rastet më të lehta, ato trajtohen në pavion dhe në reanimacion.

Mjekët neurologë të Spitalit Amerikan theksojnë se është shumë e rëndësishme njohja e shenjave të para të goditjes në tru, pasi shpëtojnë jetën e personit të prekur. Çdo minutë vlen jetë!

Për më shumë informacion ose vizitë me mjekun neurolog, kontaktoni në 042357535 ose klikoni në: rezervime.spitaliamerikan.com

Benefitet e gjakut të kordonit umbelikal. Cilësi më e mirë jete dhe jetëgjatësi!

By Spitali Amerikan - Të Reja

“Magjia” e qelizave staminale

Kur flasim për qelizat staminale duket sikur flasim për një botë “futuriste”; ku e mira dhe e keqja janë ndarë përfundimisht nga njëra – tjetra. Kur shërimi dhe zgjidhja e sëmundjes nuk është më utopi, por një formë legjitime e të drejtës për të jetuar mirë, madje dhe sa më gjatë. Nuk është më habi se shkenca sot ka mundësuar kaq afër dhe lehtësisht të realizueshëm, procesin e përmirësimit të cilësisë së jetës dhe jetëgjatësinë e njeriut.

Qelizat staminale janë çuditërisht të jashtëzakonshme për aftësinë që kanë për ndarjen dhe rindërtimin e tyre, si dhe forcën që kanë për t’u transformuar në disa lloje të veçanta qelizash specifike, si nervat dhe gjaku.

Qelizat staminale janë përgjegjësë për krijimin e organeve të njeriut, krijimit të indeve dhe sistemit imunitar, që në barkun e nënës.

Me dëshirën e prindërve, qelizat staminale mund të mblidhen duke marrë gjakun nga kordoni i kërthizës së foshnjës së sapolindur, menjëherë pas lindjes. Kjo në asnjë mënyrë nuk e dëmton nënën ose foshnjën. Kordoni umbelikal dhe placenta, dy burimet më të pasura të qelizave staminale, pas lindjes së foshnjës, gjithmonë shkojnë si mbetje biologjike në bankat përkatëse që i eliminojnë ato.

Gjaku i kordonit umbelikal përmban qeliza staminale hematopoietike të ngjashme me ato që gjenden në palcën e kockave dhe të cilat mund të përdoren për gjenerimin e qelizave të kuqe të gjakut dhe qelizave të sistemit imunitar. Qelizat staminale të gjakut të kordonit përdoren aktualisht për të trajtuar një sërë çrregullimesh të gjakut dhe problemeve në sistemin imunitar, siç janë leuçemia, anemia dhe sëmundjet autoimune.

Këto qeliza staminale përdoren kryesisht në trajtimin e fëmijëve, por gjithashtu kohët e fundit kanë filluar të përdoren dhe te të rriturit pas trajtimit me kimioterapi.

Përveç qelizave staminale janë dhe disa lloje të tjera qelizash, të cilat mund të merren nga gjaku i kordonit umbelikal. Ato quhen qelizat mesenkimale që ndodhen në kocka dhe kërce.

Mjekët sugjerojnë që prindërit e rinj të ruajnë gjakun e kordonit umbelikal, duke mbështetur fort faktin se këto qeliza që merren nga gjaku i kordonit në të ardhmen mund të përdoren për të trajtuar sëmundje të ndryshme te fëmija dhe jo vetëm, por dhe te të rriturit gjithashtu.

Në Spitalin Amerikan ofrohet mundësia e ruajtjes së qelizave staminale, të cilat merren gjatë procesit të lindjes në kordonin umbelikal, dhe më pas procesohen në kite të posaçme që dërgohen për ruajtje afatgjata në bankat e ruajtjes të bashkëpunëtorëve tanë (Life Cell Bio Bank).

Për më shumë informacion apo konsulencë të specializuar me partneret tane Life Cell në Spitalin Amerikan kontaktoni në: +355 67 610 43 93 ose klikoni në: rezervime.spitaliamerikan.com

Njihni osteoartritin. Hidhni hapa të sigurtë dhe pa dhembje.

By Spitali Amerikan - Të Reja

E njohur si sëmundja degjenerative e gjunjëve, shpinës, duarve, këmbëve, osteoartriti është dëmtimi i vazhdueshëm i amortizuesve natyralë të nyjave. Shkakton dhimbje në gju, më së shumti kur ju përkuleni ose uleni në gjunjë, apo dhimbje të gishtave të dorës. Preken moshat mbi 60 vjeç, por gjithashtu edhe të rinjtë në të 20-at dhe 30-at e tyre.

Simptomat kanë tendencën të zhvillohen ngadalë dhe shfaqen me vonesë. Karakteristike janë dhimbjet në nyje, sidomos kur keni kohë pa kryer aktivitet të rregullt fizik. Pacientët me këto shqetësime zakonisht përjetojnë mpirje të gjymtyrëve në mëngjes pas zgjimit. Kur osteoartriti prek duart, pacientët vuajnë zmadhime të gishtave, që shoqërohen edhe pa dhimbje.

Në shumicën e rasteve, osteoartriti zhvillohet në nyjat që mbajnë peshën e gjunjëve, legen ose shpinë.

Të jetosh me osteoartrit

Me kalimin e moshës dhe lëvizjes së vazhdueshme, nyjat tona bëhen më të ashpra dhe kërcet shkaktojnë më shumë dhimbje, sidomos gjatë procesit të zakonshëm siç është të veshurit. Kjo sepse kockat fërkohen me njëra – tjetrën, duke shkaktuar kështu dhimbje dhe rrjedhimisht pamundësinë për të lëvizur.

Disa pacientë kanë pak simptoma, pavarësisht nga përkeqësimi i nyjave. Të tjerë përjetojnë dhimbje dhe ngurtësi/mpirje që mund të ndërhyjnë në aktivitetet e përditshme. Osteoartriti në gjunjë ose ije mund të shkaktojë vështirësi në të ecur (çalim). Ndërsa në shpinë mund të shkaktojë dhimbje ose mpirje.

Nuk e kemi në dorë…

Një nga faktorët kryesorë të rrezikut për osteoartrit është diçka që asnjëri prej nesh nuk mund ta kontrollojë e ndalojë… procesi i rritjes. Gjinia gjithashtu luan një rol. Mbi moshën 50 vjeç, më shumë gra se meshkujt zhvillojnë osteoartrit. Në shumicën e rasteve, shkak i shfaqjes së patologjisë rezulton të jetë konsumimi normal gjatë viteve. Gjenetika apo anomalitë e lindura gjithashtu i bëjnë këta pacientë më të prekshëm.

Faktorët e rrezikut që mund t’i keni në kontroll

Duke qenë se nyjat e dëmtuara janë më të ndjeshme ndaj osteoartritit, sforcimi apo lëvizjet e pakontrolluara që dëmtojnë nyjat mund të rrisin rrezikun. Kjo përfshin sportet që kanë një shkallë të lartë dëmtimi dhe punët që kërkojnë lëvizje të përsëritura. Fryrja e gjymtyrëve është një tjetër faktor rreziku. Ajo lidhet ngushtë me osteoartritin e duarve, gjunjëve dhe ijeve.

Diagnostikimi

Është thelbësore gjatë konsultës, të përshkruani simptomat tuaja në detaje, duke përfshirë vendodhjen dhe frekuencën e dhimbjes. Specialisti do të shqyrtojë nyjat e prekura dhe mund të rekomandojë skaner ose rezonancë magnetike, për të konstatuar dëmin në kocka. Të rëndësishme janë edhe testet laboratorike për të përcaktuar llojin e artritit.

Komplikimet afatgjata

Ndryshe nga artriti reumatoid, osteoartriti nuk ndikon në organet e trupit apo të shkaktojë sëmundje. Por kjo mund të çojë në deformime që vështirësojnë lëvizjen. Osteoartriti në nyjat e gjurit mund shkaktojë daljen e gjunjëve, duke krijuar një pamje me hark. Harkimet (gungat) përgjatë shpinës mund të irritojnë nervat, duke çuar në dhimbje, mpirje ose ndjesi shpimi në disa pjesë të trupit.

Trajtimi

Terapia fizike ndihmon në përmirësimin e funksionit e përbashkët. Terapia shërben për të rritur fleksibilitetin dhe për të forcuar muskujt rreth nyjave të prekura. Fizioterapisti mund të përdorë gjithashtu edhe terapi të ngrohjes ose ftohjes, të tilla si kompresa ngrohëse ose fasha për të lehtësuar dhimbjen.

Pajisjet mbështetëse

Mbështetëset e gishtave apo për gjymtyrët e gjurit, mund të zvogëlojnë stresin në nyje dhe të lehtësojnë dhimbjen. Nëse ecja është e vështirë, patericat gjithashtu mund të jenë të dobishme. Për pacientët me osteoartrit të shpinës këshillohet për gjumin dyshek i fortë dhe përdorimi i qafores.

Aktiviteti fizik

Pacientët me osteoartrit shmangin ushtrime të caktuara fizike që ju shkaktojnë dhimbje. Por sportet më pak ndikuese si noti, ecja ose çiklizmi përmirësojnë lëvizjen dhe rrisin fuqinë. Ushtrimi me pesha të lehta ndikon në forcimin e muskujve që rrethojnë nyjat e dëmtuara. Këshillohuni me fizioterapistin për të realizuar një program posaçërisht për gjendjen tuaj.

Parandalimi

Gjëja më e rëndësishme që mund të bëni për të shmangur osteoartritin është të mbani peshën tuaj në kontroll. Gjatë viteve, mbipesha dëmton nyjat. Parandalimi i lëndimeve është gjithashtu i rëndësishëm. Është e këshillueshme dhe marrja e suplementeve të rekomanduara nga mjeku të cilat e ngadalësojnë procesin e osteoartritit, duke lehtësuar dhe simptomat që kjo sëmundje paraqet. Merrni masa paraprake për të shmangur lëndimet e përsëritura të lëvizjes në punë. Nëse ushtroni disiplina të sportit, përdorni pajisjet e duhura dhe zbatoni udhëzimet e sigurisë.

Për më shumë informacion ose vizitë me mjekun ortoped, kontaktoni në 042357535 ose klikoni në: rezervime.spitaliamerikan.com

Infeksionet e pishinave. Si të mbrohemi!

By Spitali Amerikan - Të Reja

Stina e shumëpritur e verës kërkon një vëmendje më të madhe për kujdesin ndaj shëndetit. Temperaturat e larta ju çojnë drejt destinacioneve të pushimit, det apo mal. Por ka nga ata që zgjedhin edhe frekuentimin e shpeshtë të pishinave. Fakt është, se kjo nuk vjen pa pasoja për shëndetin.

Nëse jeni frekuentues i pishinave apo parqeve ujore duhet të keni parasysh rëndësinë e mbrojtjes së shëndetit tuaj duke parandaluar infeksionet.

Pavarësisht se pjesa më e madhe e njerëzve besojnë se klori është një dezinfektues shumë i mirë për bakteret dhe arrin të na mbrojë nga kontakti me to, ju sigurojmë se klori nuk arrin t’i zhdukë të gjitha bakteret që ndodhen në ujin e pishinave. Ka baktere sot që janë shumë tolerantë ndaj klorit, të cilët shkaktojnë infeksione të rënda për trupin e njeriut. Një prej këtyre baktereve gjendet dhe në pishina. Gëlltitja e një sasie shumë të vogël nga uji i pishinës që përmban këto baktere në njerëz të caktuar, shkakton sëmundje infektive të rënda.

Bakteret e ujit përhapen duke gëlltitur ujin, si dhe duke patur kontakt me ujë të kontaminuar; si uji në pishina, liqene apo lumenj, si dhe parqet e lojrave me ujë apo shatërvane. Bakteret e ujit sjellin një sërë problemesh në organizmin e njeriut, si sëmundjet gastrointestinale, sëmundjet e lëkurës, veshit, probleme me frymëmarrjen, sytë, probleme neurologjike etj. Rastet më të shpeshta paraqiten me diarre. Diarreja shkaktohet nga bakteri Cryptosporidium, giardia lambia apo e-coli. Të gjithë njerzit që notojnë rregullisht apo ata që frekuentojnë pishinat në ditët e verës duhet të kenë parasysh të jenë të kujdesshëm, pasi kanë një rol kryesor në parandalimin e përhapjes së baktereve.

Si shkaktohen infeksionet e ujit?

Njerëzit që frekuentojnë pishinat kur prekin ujin, njëkohësisht prekin edhe bakteret që janë në të. Bakteret në zonën anale sjellin ndotjen e ujit dhe kjo është më e theksuar te personat që vuajnë nga diarreja. Infeksionet e pishinave gjithashtu mund të shkaktohen nga kimikatet në ujë ose kimikatet që avullojnë nga uji dhe shkaktojnë probleme të cilësisë së ajrit.

Cili është roli i klorit në pishina?

Prezenca e klorit në pishina sigurisht që eliminon bakteret që ndodhen në ujë, por koha për t’i zhdukur ato është e ngadaltë. Për të zhdukur bakteret si Crypto ose ndryshe Cryptosporidium që më së shumti gjendet në pishina, kërkojnë kohë më të gjatë për t’u eliminuar. Parazitët e Cryptosporidium janë një nga shkaqet më të zakonshme të diarresë infektive tek njerëzit, sepse ato nuk mund të zhduken lehtë nga klori dhe mund të mbijetojnë deri në 10 ditë në ujë, edhe në ujë të trajtuar sipas standarteve.

Për më shumë informacion ose vizitë me mjekët tanë infeksionistë, kontaktoni në 042357535 ose klikoni në: rezervime.spitaliamerikan.com

Dhembja nga Sindroma e Zyrës. Zgjidhja: Fizioterapia në Spitalin Amerikan

By Spitali Amerikan - Të Reja

Jeta moderne e qytetit përbëhet kryesisht nga puna e zyrës – qëndrimi për orë të tëra në të njëjtën pozicion përpara ekraneve të kompjuterave. Në pamje të parë, mund të thuhet se kjo ndoshta nuk mund të jetë një mënyrë e rrezikshme ose e sëmurë për të jetuar. Sidoqoftë, ajo që shumica e njerëzve nuk e dinë është se një mënyrë jetese mund të çojë në pasoja serioze, sidomos për muskujt dhe shpinën tuaj.

Çfarë është Sindroma e Zyrës?

Sindroma e zyrës është dhembja në shtyllën kurrizore ose muskujt e shkaktuar nga qëndrimi ulur ose pa lëvizje në të njëjtin pozicion për periudha të gjata kohore, kryesisht duke punuar në kompjuter në një mjedis të zyrës. Kjo dhembje, e cila mund të duket e zakonshme në fillim, mund të rezultojë në dhembje kronike, sëmundje ndërvertebrale ose diskopati dhe anomali në shpinë. Qëndrimi juaj dhe aftësia juaj për të funksionuar ose lëvizur normalisht mund të preken.

Simptomat

Shumë simptoma të Sindromës së Zyrës nuk duken në mënyrë drastike në fillim, por kur mbeten të patrajtuara mund të bëhen serioze. Disa pacientë nuk janë në gjendje të lëvizin ose të rrotullojnë qafën e tyre. Të tjera simptoma janë:

Dhembje koke
Rëndesë rreth syve
Dhembje qafe
Marrje mendsh
Dhembje kronike e muskujve
Ngurtësim në duar apo këmbë
Dhembje shpine
Vështirësi në lëvizje dhe rëndesë në shpatulla

Për disa, simptomat mund të jenë gjithashtu emocionale. Ata që vuajnë nga Sindroma e Zyrës mund të fillojnë të ndeshin ndjenjat e trishtimit, depresionit ose lodhjes ekstreme.

Shkaqet

Qëndrimi ulur me këmbët tuaja të kryqëzuara – ulur në këtë pozicion për një kohë të gjatë shkakton një çekuilibër, hedhjen e peshës në vetëm njërën këmbë, duke ndikuar në gjendjen e shpinës tuaj

– Ulur duke u anuar përpara me shpatulla
– Ulur në buzë të karriges suaj
– Ulur ose duke qëndruar me krahë të palosur
– Duke qëndruar me peshë në njërën anë të trupit – pesha e trupit tuaj duhet të përhapet në mënyrë të barabartë midis të dyja këmbëve, duke parandaluar dëmtime të mundshme dhe dhembjet
– Fjetja në krah
– Mënyra se si qëndroni duke parë tv ose qëndrimi ulur duke lundruar në internet
– Mbajtja e çantës tuaj në një shpatull
– Mbajtja e takave të larta – duke veshur rregullisht këpucë që janë shumë të larta, shpina merr disa harqe të
gabuara, që mund të çojë në dhembje shpine.

Parandalimi

Nuk mjafton të marrësh vetëm një masazh kur ndjen dhembje. Ndërsa kjo mund të lehtësojë dhembjen në afat të shkurtër, simptomat e njëjta mund të rishfaqen ose të keqësohen me kalimin e kohës. Në vend të kësaj, është më mirë të përshtasni veten dhe mjedisin tuaj. Këtu janë disa këshilla të rëndësishme:

E keni ju në dorë:

Ndryshoni pozicionin tuaj të ulur ose të punës çdo njëzet ose tridhjetë minuta zgjasni muskujt e krahëve, duart, kyçet dhe këmbët çdo orë.

Ngrihuni dhe ecni përreth. Janë edhe ushtrimet bazë të stërvitjes që mund të bëni për të ndihmuar lirimin e muskujve tuaj dhe për të krijuar një lëvizje.

Sigurohuni që kyçet e dorës tuaj të jenë në pozitë të drejtë; mos i përkulni ose i ktheni ato shumë shpesh

Merrni një pushim nga kompjuteri çdo dhjetë minuta

Uluni me një qëndrim të drejtë të shpinës

Mos u ulni në skajin e karriges tuaj

Vendosni kompjuterin dhe tastierën tuaj përballë jush

Ekrani duhet të jetë në një lartërsi pak më shumë se linja e syve

Duhet të ketë shumë hapësirë për të përdorur “maus”-in dhe për të lëvizur krahët

Kompjuteri duhet të jetë një gjatësi krahësh larg prej jush

Si ju shërben fizioterapia në Spitalin Amerikan 3?

Në Qendrën tonë, ju jeni gjithmonë të mirëpritur për një kontroll ose konsultim me specialistët tanë. Për punonjësit e zyrës, ne ofrojmë një ekzaminim të plotë të shpinës tuaj dhe mund t’ju japin këshilla nëse jeni duke vuajtur nga Sindroma e Zyrës. Edhe nëse nuk po përjetoni ndonjë simptomë, është më mirë të kontrolloheni për të parandaluar. Për rastet kronike ose serioze, specialistët tanë të njohur dhe kirurgët janë këtu për të ndihmuar dhe ofruar metodat më të mira të trajtimit.

Për më shumë informacion ose vizitë me fizioterapisten Juliana Balla në Spitalin Amerikan 3,
kontaktoni në 042357535 ose klikoni në: rezervime.spitaliamerikan.com

Kirurgjia që nuk lë asgjë pas….!! Përfitimet e Kirurgjisë Mini Invazive

By Spitali Amerikan - Të Reja

Ndërkohë që pacientët tanë mendojnë se ndryshimi midis kirurgjisë mini invazive ose laparoskopike me kirurgjinë tradicionale është se rikuperimi është më i shpejtë apo shenjat që mbetet pas janë të padukshme; përgjigjia jonë është se ndryshimi i laparoskopisë dhe kirurgjisë tradicionale është edhe ajo që pacientët nuk arrijnë ta shohin.

Përfitimi më i rëndësishëm i kirurgjisë laparoskopikë është se shkakton më pak inflamacion se kirurgjia tradicionale, ajo e hapur. Inflamacioni është reagimi i sistemit imunitar për të shëruar një plagë, përballuar një traumë, apo për të luftuar mikrobe dhe viruset. Në kirurgjitë tradicionale risku për të patur inflamacion është më i lartë, ndërkohë që në kirurgjinë laparoskopike është e kundërta. Inflamacioni i sjell pacientëve ndërlikime, duke i bërë ata mbartës të baktereve dhe viruseve të ndryshme, duke çuar më pas deri në infeksione kronike.

Një tjetër benefit i kirurgjisë laparoskopike, të cilën pacientët nuk mund ta shohin janë prerjet, të cilat shkaktojnë me pak ngjitje. Ngjitjet janë pjesë e indeve të forta dhe fikse, që lidhin organet dhe indet e barkut me njëri-tjetrin. Shkaktohen nga inflamacioni, procedurat kirurgjikale, ose të dyja. Kirurgjia laparoskopike nuk ka ekspozim ndaj baktereve apo inflamacioneve, sa mund të ketë kirurgjia tradicionale.

1. Plagët kirurgjikale me laparoskopi janë më të vogla e të padukshme

Kirurgjia laparoskopike lë pas shenja shumë të vogla, gati të padukshme. Në kirurgjinë tradicionale çarja në zonën e abdomenit është e madhe, kjo në varësi dhe të rasteve specifike. Në rastin e kirurgjisë laparoskopike, kirurgu bën disa prerje të vogla, të cilat janë përafërsisht deri në 1 cm. Prerjet e vogla janë më pak të dhimbshme dhe lënë shumë më pak shenja. Rikuperimi i plagës është më i shpejtë me laparoskopi.

2. Kirurgjia laparoskopike – Kohë më e shkurtër hospitalizimi

Plagët e vogla nuk janë e vetmja karakteristikë e mirë e laparoskopisë, kjo pasi kirurgji tradicionale do të thotë qëndrim më i gjatë në spital. Kirurgjia mini invazive laparoskopike nga ana tjetër do të thotë trauma më të lehta për plagët dhe automatikisht koha e rikuperimit është më e shpejtë, e hospitalizim më i shkurtër.

3. Prerjet laparoskopike janë gjithmonë më të sigurta se prerjet tradicionale Prerjet në kirurgjinë laparoskopike kanë risk të ulët për të sjellë infeksione apo për të mbartur baktere, kjo për arsye sepse plagët janë shumë të vogla dhe bakteret nuk arrijnë të depërtojnë në abdomen.

4. Kamera laparoskopike

Në kirurgjinë laparoskopike përdoret një kamera, e cila arrin të depërtojë dhe të sjellë pamje reale në një dimension shumë të qartë dhe i gjithë procesi i ndërhyrjes kryhet në mënyrë shumë efikase.

5. Kirurgjia laparoskopike po aq efektive, sa dhe kirurgjia e hapur

Që prej vitit 1970 kur u aplikua për herë të parë kirurgjia laparoskopike, qindra studime të tregojnë se kirurgjia laparoskopike është po aq efektive, sa dhe kirurgjia e hapur. Madje që prej asaj kohe e deri më sot, kirurgjia laparoskopike është përdorur masivisht në kirurgjinë e tëmthit apo të kancerit të kolonit. Kirurgjia laparoskopike është një ndër zgjidhjet më të mira për kirurgjinë bariatike apo bypassin gastrit.

Kirurgjia laparoskopike vlerësohet si një nga arritjet më të mëdha të shkencës në fushën e mjekësisë. Në të shumtën e rasteve pacientët që i nënshtrohen kirurgjisë laparoskopike kanë rikuperim më të shpejtë, shenja pothuajse të padukshme dhe arrijnë t’i kthehen jetës normale në një kohë shumë të shkurtër.

Për më shumë informacion ose vizitë, kontaktoni në 042357535 ose klikoni në: rezervime.spitaliamerikan.com

Spitali Amerikan thyen rekordin e vet në Fertilizimin in Vitro

By Spitali Amerikan - Të Reja

Të bëhesh nënë, tani nuk njeh më moshë dhe limite. Spitali Amerikan regjistron rekordin e radhës në fushën e Fertilizimit in Vitro. Ekipi i IVF i drejtuar nga Dr. Elton Peçi dhe embriologu Dr. Besfort Ferhati kanë kryer me sukses një procedurë Fertilizimi in Vitro në rastin e një pacienteje italiane në moshën 62 vjeçare. Është thyer kështu rekordi i vitit 2013 i po këtij ekipi, kur u raportua lindja e parë e një femre në moshën 56 vjeçare pas një procedure IVF.

Sipas Dr. Elton Peçi, veçantia e këtij rasti është që kemi të bëjmë me të parën shtatzëni në moshën 62 vjeçe në Shqipëri dhe kjo është realizuar nëpërmjet Fekondimit in Vitro. Për momentin pacientja është në javën e 14 të shtatzënisë dhe gëzon një evolucion normal të saj. Nuk është e para herë që në Spitalin Amerikan drejtohen pacient të huaj. Mosha e saj 62 vjeç përbën rekord për Shqipërinë, madje edhe për Italinë, pasi lindja përmes Fekondimit in Vitro në moshën më të avancuar në Itali, i përket një rasti para dy vitesh në moshën 62 vjeçare.

Deri tani ecuria e shtatzënisë ka qenë mëse normale. Kjo konsiderohet si revolucion monoton, pasi që nga momenti i rezultatit pozitiv, çdo gjë ka ecur normalisht. Zhvillimi i embrionit ka ndjekur të gjitha etapat që mund të ketë kërkuar një zhvillim normal në tremujorin e parë të shtatzënisë.

Zj. Anna Rita Marini, pacientja italiane 62 vjeçare, ka shprehur entuziazmin për lajmin e bukur dhe të aq shumë pritur të shtatzënisë duke treguar më shumë për eksperiencën e saj në Spitalin Amerikan: “Kam provuar gjatë në Itali për të realizuar dëshirën time për t’u bërë nënë, por pa sukses. U konsultova dhe vendosa të provoj jashtë Italisë. Jam shumë e lumtur që zgjodha Shqipërinë dhe gjeta këtu këtë shërbim të specializuar, dhe mjekë të komunikueshëm dhe me të gjitha përgjigjet për mua. Këtu ndihem më shumë si në shtëpinë time, sesa në Itali. Më duket e pabesueshme kur mësova lajmin e shtatzënisë. Uroj që gjithçka të shkojë mirë deri në fund.”

Për më shumë informacion ose vizitë me mjekët tanë të qendrës së IVF kontaktoni në 042357535 ose klikoni në: rezervime.spitaliamerikan.com

Zbuloni në kohë melanomën. Kontrollet që duhen kryer

By Spitali Amerikan - Të Reja

Melanoma zakonisht shfaqet mes moshës 30 – 60 vjeç dhe përbën 2-3% të tumoreve. Me termin melanomë kuptohet kanceri i lëkurës, i cili e ka origjinën nga melanocitet; qelizat që kanë si funksion të tyre prodhimin e melaninës, substancës përgjegjëse për ngjyrën e lëkurës. Mund të formohet në zonat më të errëta të epidermës, ku ka ose nuk ka nishane.

Melanomat përgjithësisht klasifikohen në katër faza (nga I në IV), ndërsa faza 0 tregon stadin fillestar që ndikon vetëm në shtresën e sipërme të lëkurës.

Njihni shkaqet

Faktorët që mund të shkaktojnë zhvillimin e melanomës janë të shumta. Nuk duhet nënvlerësuar prania e nishaneve dhe sidomos atyre të reja. Një zile alarmi mund të jetë prania e më shumë se 100 nishaneve. Djegiet nga dielli në fëmijëri dhe në adoleshencë dhe ekspozimet e tepruara në diell janë faktorë rreziku të një rëndësie të veçantë. Qëndrimi për një kohë të gjatë në diell, mund të dëmtojë ADN-në dhe të shkaktojë një transformim të tumorit. Ndaj kini parasysh se edhe nxirja artificiale me llamba solar duhet të bëhet me shumë kujdes. Një rëndësi të madhe kanë karakteristikat gjenetike, një sistem imunitar jo i mirë, historia familjare ose prania e të paktën një rasti tjetër me melanomë në familje.

Kur duhet të shqetësoheni

Përpara se të kryeni diagnoza më të thella, fillimisht duhet të bëni vetë një ekzaminim të lëkurës. Mënyra më e mirë për ta bërë këtë është pas dushit, në një dhomë të ndriçuar mirë. Kur një nishan, i formuar kohët e fundit ose ekzistues ka marrë gjithmonë një formë të ndryshme, të parregullt, ndryshon ngjyrën, rritet, shkakton kruarje dhe ka një formë të dhëmbëzuar. Mjeku dermatolog në këto raste ju këshillon për një ekzaminim më të detajuar.

Diagnostikimi

Dermatologu do të kryejë një vizitë të të gjithë nishaneve të vjetër dhe të rinj në trup, duke vlerësuar historinë familjare dhe praninë e shenjave apo simptomave të melanomës së lëkurës. Për të qenë të sigurtë se jeni duke u përballur me një rast të kancerit, është absolutisht e nevojshme që nishani dhe zona e dyshimtë të hiqen në mënyrë kirurgjikale përmes një biopsie. Një ekzaminim histologjik do të bënte të mundur konstatimin e pranisë së qelizave kancerogjene. Rezultati i ekzaminimit bën të mundur përcaktimin e dendësisë së qelizave kancerogjene dhe llojin e melanomës për të vijuar me planifikimin e ndërhyrjeve të mëtejshme. Diagnostikimi imazherik; si skaneri dhe rezonanca magnetike përcaktojnë nëse ekziston dhe ku është përhapur sëmundja.

Parandalimi

Ka sjellje të cilat mund të zvogëlojnë rrezikun e zhvillimit të melanomave. Eshtë i domosdoshëm ekspozimi në mënyrë të moderuar në diell që në moshë të hershme, veçanërisht duke shmangur orët më të nxehta dhe duke minimizuar përdorimin e nxirjes artificiale me llamba solar. Në diell është e këshillueshme të mbani kapele, syze dielli dhe kremra mbrojtës. Është e rëndësishme që të kontrolloni periodikisht vetveten: vetekzaminimi ndonjëherë mund të bëjë të mundur identifikimin e ndryshimeve në kohë dhe ndërhyrjen në periudhën më të shkurtër të mundshme. Rekomandohet ekzaminimi i lëkurës çdo tre vjet midis moshave 20 deri në 40 vjeç dhe një ekzaminim i përvitshëm pas moshës 40 vjeç.

Trajtimi

Sot është e mundur që të zgjedhim midis operacionit që shpesh trajton në mënyrë përfundimtare sëmundjen në fazën fillestare. Radioterapia përdoret për të kuruar melanomën që shfaqet pas një trajtimi tjetër ose si terapi ndihmëse pas operacionit. Kimioterapia në përgjithësi nuk është shumë efikase, por mund jetë e dobishme në lehtësimin e simptomave në fazat e avancuara. Ka edhe vaksina edhe terapi të targetuara, ndërsa gjithnjë e më shumë janë duke u studiuar strategji të tjera imunoterapeutike.

Për më shumë informacion ose vizitë me mjekun dermatolog kontaktoni në 042357535 ose klikoni në: rezervime.spitaliamerikan.com

Venat varikoze dhe “venat merimangë”

By Spitali Amerikan - Të Reja

Shumë njerëz janë të shqetësuar për pamjen e këmbëve të tyre. 15-20% e tyre kanë vena të dukshme varikoze, ndërkohë që e njëjta përqindje i kannë të fshehura dhe shfaqin simptoma të tilla si dhembje në këmbë, këmbë të ënjtura, kruarje, ndryshime të ngjyrës së lëkurës. “Venat merimangë” zakonisht nuk shfaqin simptoma mjekësore, por janë edhe më të zakonshme; më shumë se 84% e njerëzve kanë kapilarë të dukshëm në njërë nga këmbët. Të dyja situatat janë pasojë e të njëjtit shkak: presionit në enët e gjakut kur valvulat nuk funksionojnë siç duhet dhe nuk arrijnë të kthejnë gjakun nga ekstremitetet e poshtme në zemër.

Gjatë qëndrimit në këmbë, gjaku venoz e ka më të vështirë të lëvizë nga periferia drejt zemrës për shkak të forcës së gravitetit. Venat kanë valvula të cilat bëjnë të mundur që gjaku të mos mbetet në pjesën e poshtme të këmbëve. Nëse valvulat nuk mbyllen siç duhet, gjaku nuk ngjitet lart dhe ushtron presion në muret e venës, duke shkaktuar variçet. Presioni në sistemin venoz mund të shkaktojë gjithashtu kapilarë të vegjël nën sipërfaqen e lëkurës të cilët zgjerohen dhe bëhen më të dukshëm duke marrë pamjen e një harte venash të njohurasi “vena merimangë”.

Çfarë trajtimesh përdoren për venat varikoze?

Kirurgjia “stripping” e variçeve është mënyra tradicionale e trajtimit të venave varikoze. Është trajtim efikas dhe mund të kërkojë qëndrimin spitalor 24 orë ose pacienti mund të dalë nga spitali 4-5 orë pas operacionit. Mënyra të tjera të trajtimit janë me radiofrekuencë, përmes së cilës bëhet mbyllja e venave problematike duke përdorur ngrohjen. Në mungesë të kësaj teknike mund të përdoret skleroterapia me shkumë. Kjo e fundit realizohet me anë të një lënde kimike në formën e shkumës e cila përdoret përtë eliminuar venat problematike. Për ata pacientë që kanë simptoma nga venat varikoze, “çorapet shtrënguese” duhet të rekomandohen si një trajtim i përhershëm, nëse opsionet e tjera janë të papërshtatshme. Çorapet elastokompresive janë shumë të rëndësishme dhe marrja e tyre nga pacienti duhet bërë vetëm me recetë mjekësore nga specialist kirurg vaskular. Grada e shtrëngimit e nevojshme për trajtimin e venave jepet në bazë të gradës së insufiçiencës së venave të pacientit.

“Venat merimangë” mund të trajtohen duke injektuar një substancë sklerotizuese e cila i djeg këto vena. Është një procedurë që kryhet në disa seanca.

Për më shumë informacion ose vizitë me kirurgun vaskular kontaktoni në 042357535 ose klikoni në: rezervime.spitaliamerikan.com

31 Maji, Dita Botërore pa Duhan!

By Spitali Amerikan - Të Reja

Tymi i duhanit, i cilësuar jo pak herë si tymi i bardhë që vret, është tymi që del nga konsumimi i duhanit dhe letrës mbështjellëse të tij.

Ky tym përmban deri në 4 mijë substanca kimike, ku më të dëmshme për organizmin klasifikohen katrani, monoksidi i karbonit dhe nikotina. Filtrat reduktojnë sasinë e këtyre substancave që futen në organizëm përmes rrugëve të frymëmarrjes, por nuk i eliminojnë ato.

Acidi cianhidrik, akroleina, formaldeida dhe amoniaku janë gjithashtu të pranishëm në tymin e duhanit duke shkaktuar dëme të menjëhershme në mukozën e rrugëve të frymëmarrjes.

Katrani në përbërjen e tij përfshin disa substanca, mes të cilave më e njohura është benzonpireni dhe hidrokarburet aromatike. Është vërtetuar se këto substanca janë kancerogjene.

Veç të tjerash, katrani irriton rrugët e frymëmarrjes, zverdh dhëmbët, keqëson erën e gojës dhe lë një shije të hidhur.

Monoksidi i karbonit pengon hemoglobinën të transportojë sasinë e duhur të oksigjenit në organizëm.

Nga ana tjetër, nikotina si alkaloid natyral, i pranishëm në duhan në një përqindje që varion nga 2 deri në 8%, përveçse përmban doza helmuese, krijon varësi për përdoruesit! Stimulon çlirimin e dopaminës në Sistemin Nervor Qëndror dhe atë të adrenalinës nga gjendra mbiveshkore. Për aq kohë sa konsumon duhan, stimulon mendjen dhe trupin,; por menjëherë më pas humori përkeqësohet, duke e nxitur kështu duhanpirësin të ndezë cigaren e radhës për të shijuar sërish emocionet pozitive.

Përveç varësisë farmakologjike nga nikotina, duhanpirësi krijon edhe një varësi psikologjike. Kur ndalon pirjen e duhanit, manifestohet gjendje si:

nervozizëm, zemërim, ankth;
dëshirë e pakuptueshme për të pirë duhan;
vështirësi në përqëndrim;
deri edhe pagjumësi.

Disa nga dëmet e duhanpirjes që shfaqen në aparatin e frymëmarrjes janë:

irritimi,
mukusi i shtuar,
bronkiti akut,
më pas bronkit kronik,

Dhe emfizemë pulmonare.

Nuk përjashtohet edhe mundësia për infeksione në rrugët e frymëmarrjes dhe astmë.

Nuk duhet të harrojmë se pirja e duhanit rrit rrezikun e shumë llojeve të kancerit; në rrezik janë para së gjithash rrugët e frymëmarrjes pasi ato janë të ekspozuara drejtpërdrejt ndaj pirjes së duhanit. Te duhanpirësit rreziku për kancer të mushkërive është 20 herë më i lartë se te personat që nuk pinë duhan. I lartë paraqitet edhe rreziku i kancerit në veshka dhe në fshikëzën e urinës, duke qenë se substancat kancerogjene të duhanit eliminohen nga veshkat dhe dalin nga fshikëza me anë të urinës.

Nëse jeni duhanpirës, bëni gjithçka të mundshme për ta lënë duhanin.

E keni ju në dorë, bëjini një dhuratë të bukur vetes, lini duhanin dhe përmirësoni cilësinë e jetës tuaj!

Për më shumë informacion ose vizitë me mjekun toksikolog kontaktoni në 042357535 ose klikoni në: rezervime.spitaliamerikan.com

Page 6 of 7«‹4 567 ›