Spitali Amerikan, në vazhdimësi të shërbimit shëndetësor dhe trajtimit profesional për pacientët me probleme shëndetësore në nevojë, i është përgjigjur thirrjes për ndihmë për një krevat elektrik nga pacienti Arsen Uka 60 vjeç.

Arsen Uka, i aksidentuar në moshën 25 vjeçare dhe për këtë arsye prej 35 vitesh i paralizuar nga një dëmtim i pakthyeshëm i shtyllës kurrizore, sot ka pritur në shtëpinë e tij krevatin e dhuruar nga Spitali Amerikan.

Apelit për ndihmë drejtuar spitalit në faqen sociale zyrtare të Facebook-ut, i është përgjigjur në mënyrë të menjëhershme ekipi drejtues, duke i mundësuar kështu në harkun kohor të brenda pak ditëve krevatin e shumëpritur për gjendjen e tij specifike shëndetësore.

Sot, pranë ambjenteve të Spitalit Amerikan 1 në Laprakë janë paraqitur familjarët e pacientit të cilët kanë bërë tërheqjen e krevatit elektrik. Të emocionuar kanë shprehur falenderimet e tyre për ndihmën dhe gatishmërine e treguar nga ky institucion për t’ju përgjigjur në kohë dhe me humanizëm nevojave të pacientit.

Të vëmendshëm ndaj thirrjeve për ndihmë, duke treguar përgjegjshmëri dhe profesionalizëm në çdo nismë dhe asistencë mjekësorë për pacientët në nevojë, Spitali Amerikan dëshmon për të disatën herë vlerat e një institucioni të mirëfilltë shëndetësor dhe të përgjegjshëm në përmbushjen e nevojave edhe të pacientëve në vështirësi ekonomike dhe shëndetësore.